في طريقة لتزيد الإنتاجيّة ... بتعرف شو هيّ؟
Posted on 31/07/2014
 

في طريقة لتزيد الإنتاجيّة ... بتعرف شو هيّ؟

لأ، ما عم نحكي عن " كيف تقيس" إنتاجيتك، عم نحكي "كيف تزيدها". ولتزيدها، في طريقة معيّنة إذا عرفت كيف تتّبعها، رح تحسّ بالفرق. كتار حكيوا وكتبوا عنّا، بس ما حدا خبّرنا كيف! لهيك نحنا رح نعطيك 10 نصايح سهلة بتساعدك تزيد إنتاجيك يوم بعد يوم:

1. لازم توعا بكّير وتبلّش يومك بشويّة SPORT وترويقة صحيّة لتحافظ على نشاطك وتركيزك خلال النهار وحتّى إنّها بتخلّيك بأوقات كتيرة محمّس زيادة. والوعية بكّير هيّ من أسباب نجاح أكتريّة الشخصيّات البارزة بمجتمعنا اليوم.

2. حضّر جدول بأعمالك لتختصر نصّ المسافة نحو تحقيق أهدافك. ما عليك إلا تجهّز لكلّ شي قبل بوقت وتحدّد برنامج تتّبعه ليساعدك تتجنّب تضييع الوقت بسبب مواقع التواصل الإجتماعي، الرسايل الإلكترونيّة والإنترنت لأنّها كفيلة إنّها تقضي على كافّة عناصر الإنتاجيّة.

3. إنت بس بلّش لأنّ وقت بتبلّش بأيّ عمل ما رح تتركه قبل ما يصير جاهز ورح تشوف كيف الوقت رح يقلب لصالحك.

4. تصوّر وتسمّع لأنّ لتنجح لازم تحدّد أهدافك، وبس يكون عندك صورة واضحة عنها، بتصير تعرف شو الخطوات المناسبة لتنجّحها. وضروري تتسمّع للنصايح والملاحظات وتتقبّلن لأنّن بفيدوك.

5. تعلّم تقول لأ والتزم بجدول أعمالك، وإذا لقيت طلب المساعدة مش ضمن أولويّاتك، لازم تعتذر عن المساعدة وإلّا ما رح فيك تخلّص شغلك!

6. ما تفتّش على الكمال بكلّ عمل بتقوم فيه لما تحدّ من إنتاجيتك. ما تأجّل بحجّة إنّك ناطر الوقت المناسب لأن معقول ما يصير. اليوم هيّ اللحظة المناسبة!

7. الفرصة لو كانت قصيرة كتير ضروريّة. يمكن إنت بحاجة إلها لتوقف، لتنام شوَي، لتسافر أو يمكن بس لتسترخي ومن بعدها شوف كيف بترجع عالشغل بحماس أكتر وكيف بتزيد إنتاجيتك!

8. فيك تتّكل على غيرك وما تقنع حالك بفكرة "أنا أو لا أحد"، لأنّ بتكون عم تضيّع وقتك بتفاصيل صغيرة وتفوتك تفاصيل أهمّ. بالعكس، ركّز اهتمامك على الأهداف الكبيرة يلّي بدّك تحقّقها.

9. ما تكون الشخص الخارق يلّي بيقدر يعمل أكتر من شغلة بنفس الوقت لأنّ الدراسات برهنت إنّو "فينا نزيد إنتاجيتنا إذا خلّصنا كلّ شغلة بشغلتها".

10. حسّن مكان شغلك لأنّ جوّ الشغل بيقدر ينعكس بشكل سلبي أو إيجابي على تصرّفاتك، أداءك وإنتاجيتك. فإذاً، ضروري ترتّبه متل ما إنت بتحبّ لتكون مرتاح فيه.

 

Nadine - Blogger 

© 2016 BankOfBeirut.com. All Rights Reserved