طلعت تقاعد، مبروك
Posted on 30/11/2016
 

طلعت تقاعد، مبروك!

بتعيش حياتك ركض بركض، ومن كتر ما بتركض بتنسى ترتاح وبتصير عم تعدّ كم سنة بعد عندك لتطلع تقاعد. وبس يصير الوقت، على قدّ ما بتكون محمّس على قدّ ما بكون بالك مشغول وخايف ما يكون عندك مصاري تكفّيك خاصّة بلبنان، لأنّ ما فيك تتّكل على تقاعد الدولة، على الأرجح ما يكفّيك أكتر من سنة أو حدّها سنتين.

أكيد مش بكّير تخطّط للتقاعد، خاصّة ببلد إمكانيّاته كتير محدودة. التحضير لمرحلة التقاعد بساعدك تعرف الوقت المناسب لتقوم بهالخطوة. متطلّبات الحياة زادت بشكل كبير وصرنا اليوم بحاجة يكون معنا مصاري أكتر لنقدر نعيش مرحلة التقاعد برفاهيّة أكبر. بس كيف بتعرف شو المبلغ يلّي بتحتاجه للتقاعد؟ شو نمط الحياة يلّي عبالك تعيشه؟ وكيف بتحدّد ميزانيّة المستحقّات بس تتقاعد؟

-    لو كان بعد بكّير لتتقاعد، لازم تفكّر تفتح حساب توفير بالبنك، ومنّك بحاجة تخصّص مبالغ كبيرة بالوقت الحالي، لأنّ المبالغ الصغيرة رح تزيد مع الوقت. وما تنسى تفاوض دايماً لتحصل على أفضل معدّل فايدة.

-    إذا كنت محظوظ بإنّك موظّف بشركة خاصّة بتعطيك معاش بكفّيك لتجمّع مصاري، ما تتردّد بفتح حساب توفير خاصّ فيك.

-    بس تصير بسنّ التقاعد وبعد منّك جاهز ماديّاً، اسأل شركتك إذا فيك تشتغل نصّ دوام لفترة كم سنة وما تخاف بضلّ عندك وقت كافي لتتمتّع بالحياة.

-    استشير مخطّط مالي ليدرس ميزانيتك وكلّ امورك الماليّة ويساعدك تحدّد استراتجيّة مناسبة للتقاعد.

التقاعد مش لازم يكون فترة إرهاق وقلق، بالعكس لازم يكون مرحلة نقاهة لتستمتع بالحياة متل ما بتستاهل. وحتّى لو كان بعد بكّير، بلّش جمّع مصاري اليوم لتعيش مرتاح بكرا لمّا تصير بسنّ التقاعد.

 

Nadine - Blogger 

 

 

© 2016 BankOfBeirut.com. All Rights Reserved