عم تحلم تملك بيت بلبنان؟
Posted on 30/10/2016
 

مين فينا ما بيحلم يملك بيت ببلده! بس صار إنّك تملك بيت حلم شبه مستحيل لكلّ لبناني بيشتغل وبعيش بلبنان. أسعار البيوت ببيروت خياليّة وبتوازي أسعار البيوت بأهمّ مدن العالم، متل لندن ونيويورك وباريس بس الفرق إنّو المعاشات عنّا مش متل معاشاتن يعني بالكاد تكفّي العيلة. وبلبنان وبعكس العالم، بيت بالضيعة ما كتير بيفرق بالسعر عن بيت بالمدينة.

أوقات ما بتقدر تجمّع حتّى حقّ دفعة أولى لبيت وهيّ ما بتشكّل إلّا نسبة صغيرة من قيمتو. وكتار منّا بينسوا إنّو في مصاريف زيادة بترافق شراية البيت، متل رسوم التسجيل، والفايدة، والتأمين والصيانة وفواتير الميّ والكهربا، وغيرها وغيرها. كلّها مصاريف إضافيّة لازم تكون قادرة تتحمّلها.

ومع هيدا، إنت قادر تحقّق حلمك بإنّك تملك بيت لإلك. أكيد هالشي بيطلّب كتير من العمل والتعب، والأبحاث والتخطيط وتجميع المصاري والالتزام بميزانيتك. منّا مهمّة مستحيلة إذا كنت جدّي بالموضوع!

 بالأوّل لازم تفكّر كيف فيك تجمّع مصاري وتحطّ خطّة لتأمّن حقّ دفعة أولى للبيت. ولازم تراجع الطريقة يلّي تعوّدت عليها بصرف المصاري وتحدّد ميزانيّة لتلتزم فيها. وهيك بصير فيك تقرّر المبلغ يلّي رح تخصصه كلّ شهر للدفعة الأولى.
 


تانياً، لازم تكون واقعي بس تفتّش على بيت. لأن يمكن ما تكون قادر تشتري بالوقت الحالي دوبلكس أو فيلا بالمدينة. دوّر بالمناطق يلّي بتهمّك واعمل مقارنة. حاول تلاقي بيت ما يكون كتير بحاجة لتغييرات وتجديدات. فكّر بحسنات وبسيّئات البيوت يلّي ضمن ميزانيتك.

إذا كان بهمّك تجمّع مصاري حقّ بيت بأقرب وقت ممكن، لازم تغيّر نمط حياتك لتسرّع بالإجراءات. خفّف المصاريف غير الضروريّة، سدّد ديونك وأمّن شغل إضافي، خفّف الضهرات والسفرات، وتخلّص من البطاقات الائتمانيّة – لازم تكون صارم مع نفسك، وإلّا بتضلّ كلّ حياتك عم تجمّع.

ولما تتعرّض لأي إغراءات، نسّق مع البنك يلّي بتتعامل معه ليتحوّل المبلغ يلّي عم تجمعو مباشرة لحساب توفير خاصّ فيك أوّل ما ينزل معاشك. وبتقدر تختار حساب توفير مجمّد بيمنعك تسحب أي مبلغ قبل تاريخ الاستحقاق.

 

© 2016 BankOfBeirut.com. All Rights Reserved